Gemeindeverwaltung HolderbankHauptstrasse 97 · 4718 Holderbank · Tel. 062 390 16 61 · Fax 062 390 02 23 · info@holderbank-so.ch

Mythen und Sagen

Bleumatthölzlichrüz

 

In eren alte Chronik stoht, im Johr 1545 syg z Holderbank d Mühli samt der Bleuj verbrannt. Dodruf het me d Mühli, wo vorhär öschtlig vom Dorf am Augschtbach gstanden isch, is Dorf yne verleit. D Name Bleumatt und Bleumatthölzli si aber blibe.

 

Doch gly drufabe, het si i der Bleumatt es grüssligs Unghüür ygnischtet, e Drach. Am Tag het si das Vych verschloffen und het gschlofe. Aber znacht isch de der Tüfel losgange. Da Drach het zerscht pfupft, gschnützt und gruret, de het er afo mööggen und göjsse, so lut, ass s eim fascht d Wand ufgjagt het. Derzwüsche het er gwejsset, pfiffen und ghornet, ass s de Lüt dur March und Bei gangen isch. D Chind hei vor Angscht nümme chönne schlofe, und d Geissen und d Chüe im Staal hei mängisch verwehrt. So hets nümme chönne wytergoh.

 

Do si die junge Burschte vom Dorf zämegstande, für das Unghüür goh zbodige. Mit Heugable, Dröschpflegle, gradgstellte Sägetzen und buechige Chnüttlen uusgrüsch-tet, si si am enen Obe bym ynachten em Blaumatthölzli zue; wo me scho s erschte Pfupfe ghört het. Wo si aber süüferli nöcher chöme, schnellt da Drach, wo men i der Feischteri nummen äs Schatte het chönne gwahre, vom Boden uf. Baumhoch stoht er vor dene verchlüpfte Burschten uf de Hinderbeine, streckt die grässlige Chlauen uns, und wott die vorderschte zwee vermählen oder verrysse. Die chönne grad no, eine rächts, der ander links sytligen uuswyche, wo das Unghüür wider z Bode pletscht. Wowoll, do ischs mit ihrem Muet und ihrer Begeischterig nümme wyt här gsi. Si hei d Finke gchlopfet, und si was gisch, was hesch dervo gsprunge ; si hei si nit emol meh getraut zrugg z luege.

 

Do het d Gmein bschlosse, me well änen am Bach, uf der andere Syte vom Bleumatthölzli, es Chrüz ufstelle. Wenn doch euserein nüt uusrichti gege das böse Tier, so well mes em Herrgott überlo, für em der Meischter z zeige; es chönn ebe sy, ass e böse Geischt i der Gstalt vo dam Drach d Lüt well cho verschrecke.

 

Vom Tag ewägg, wo me das Chrüz ufgrichtet und ygsägnet het, hei d Holderbanker wider ruehig chönne schlofe. Me het vo dam wüeschte Drach e keis Dingeli meh gseh oder ghört. DasHolzchrüz bym Bleumatthölzli isch de spöter dur nes steinigs ersetzt worde, mit der Johrzahl 1800.

 

 

zur Übersicht

 

 

Keine Box

Keine Box

Keine Box